مصطلحات محاكمية

واي معلومات محتاجها عن القضيه بتلجأ ليه وبيوجهك سواء كانت القضيه في مرحله التحقيق بيقولك عند وكيل النيابه مين أو القضيه نزلت جلسه بيقولك اليوم والتاريخ والدائره ولو عايز تطلع شهاده بتجيب معلومات من الجدول وهكذا.

( الأجندة ) = بيتسجل فيها اللي تم في الجلسه وارقام الحصر وبنعرف منها القرار السابق للجلسه او بنعرف منها الرول وبتبقى موجوده مع السكرتير الجلسه أو المسمى القانوني امين السر.

و الأجندة دي بيبقى محدد فيها الجلسه باليوم يعني لما تروح تسأل هتسأل وتقول مثلاً :

لو كانت الجلسه محدد لها تاريخ تشوف اليوم مثلاً ٢٠٢٢/٢/٢٢ الموافق يوم ايه .... يوم الاحد تدخل وتقول اجنده يوم الأحد مع مين وتشوفها مع سكرتير الجلسه.

( الاستيفاء ) = بيكون موجود في القسم والمحكمه وده عباره عن مجموعه من أمناء الشرطة اللي لو في إجراء ناقص او خانة مش كامله في المحضر هما اللي بيكملوها.

( الرول ) = ودي عباره عن قائمه بتبقى مكتوبه على باب الجلسه مترتب فيها القضايا اللي هتتداول في الجلسه وبتدور على الاسم بتاعك او اسم موكلك وبتعرف انت رقم كام في الجلسه علشان لما الحاجب ينادي عليك أوقات بيقول الرول رقم كذا وأوقات بينادي برقم الرول وأسماء الخصوم .

( الحاجب ) = دا الموظف اللي بيقف يقول محكمه وقت الجلسه واللي بينادي على الرول والقضايا والجلسه شغاله.

( الفهرس ) = بنعرف منه ان كان في قضايا مرفوعة على موكلي ولا لا يعني ده اللي بيرتب القضايا اللي داخله المحكمة.

( دفتر الحصر )

في نوعين من ارقام الحصر :

1-حصر تحقيق = وده بيبقى لسه القضيه في مرحلة تحقيق وموجوده عند وكيل النيابه معين وبتاخد رقم حصر تحقيق علشان لما تروح الكمبيوتر تقولهم رقم حصر تحقيق عن ايه اللي حصل فيها .

2- حصر قضايا = بيبقى بعد القضيه ما يتحكم فيها وده بيبقى موجود في غرفه التنفيذ داخل المحكمه واللي بنعرف منه لو كان المتهم عمل معارضه من عدمه او استأنف ولا لا

( دفتر الصادر والوارد ) = بيكون موجود في المحكمه وبيبقى عباره عن الفهرس المتسجل في المحاضر اللي جايه من القسم او لو القضيه مثلا أخذت إحالة من المحكمه لمحكمه او من محكمه لمصلحه الخبراء وهكذا وبناخد الارقام الصادر ووارد من إلي المحكمة .

( رئيس القلم ) = هو رئيس السكرتاريه بتاع الجلسات واللي بيبقى معاه الاختام وختم النسر وبيتحدد من عنده الرسم لما بترفع الدعوي وبتختم من عنده اي ورق متعلق بدايرته.

( سكرتير الجلسه ) = السكرتير اللي بيكتب ورا القاضي بيبقى معاه الأجندة بتاعه اليوم والجلسه ولما تيجي تاخد صوره رسميه من محضر والحكم بيبقى من عنده.

( حرس المحكمه ) = بيبقى في مقدم او رائد شرطة إسمه القائد الحرس وتحته ظباط وأمناء شرطة ودول بيبقوا موجودين وقت الجلسه برده.

( الحفظ ) = وده بقى لما القضيه بيصدر أمر بالحفظ المحضر مثلاً من النيابه او لم يتم الحكم فيها بتنزل مكتب الحفظ وكل حاجه بتفضل عنده لو روحت بعد سنتين او خمسه سنين مثلاً هتلاقي الملف القضيه عنده.